Tulun Gulu Gulu

Miloh oku nopo daa popoguli timpu nga gumuli oku daa maso di laid poh. Siintong om siiloh oku daa poingkukuro kopio kawaya-wayaon dot tulun di laid. Siintong oku daa poingkuro koposion diolo, poingkuro yolo morobuat, nunu akanon, nunu pagansakan, nunu tayam tayam, nunu rasuk, om suai ngai.

Osorou ku taki om todu (tina) ku di laid hilo kampung diolo. Monsu nopo nga hiri'd kubong, pointoruk do sosogohon. Iri nopo sosogohon nga winonsoi mantad poring. Haro nogi poring pianan dot woig tinumon toi ko onsokon. Mogonsok taakanon nopo nga mamakai dot dompuran rinokitan dot siduon. Asadap tomod pogogonsok di todu ku di laid, osorou ku dot insan minogonsok yau dot manuk ... linanggang tomod aiso tumau dot pomoguring. Susuai kaakanon nga asadap tomod mah. Rapawon nopo nga logubon nopo do waig, kuaan dot tusi om samaian noh dot kinoring palanuk. Asadap tomod kaakanan.

Di laid nopo nga ingkuri oku koongoi hilo kampung taki ku sabab osodu tomod gia koiyonon diolo om minog dot mamanau gakod moi hilo tu aiso poh jalan raya maso dii. Om sabab dot okoro oku poh maso di, ingkuri oku pabanaron moi tanud muli hilo kampung taki ku tu amu katampas mamanau osodu kaa tapa ku. Koiyonon nopo taki om todu ku di laid nga poilusok tomod hilooo tanga kopuruan. Dondo, haro nodi jalan raya mongoi hilo nga kuroyon pooh, amu noh di hino todu ku. Taki ku nopo nga poimpasi poh kasari dondo nga pointoning nodi yau walai dahai tu nokolohing tomod noh yau, minog dot haro tulun miintong dau tikid tadau.

Nung kaa dondo, poinsuai-suai nodi koposion. Di laid, apasih po kasari aiso pia tusin. Parai tonomon sondiri, rapawon nopo nga kotuon nopo mantad gouton, samai - sada, palanuk, manuk, karabau om nunu nopo - nga gomiton nopo sondiri amu tagal dot tusin. Amu oku koilo di laid poingkuro yolo kaanu tusi om gula nga sinoritaan oku di laid dot haro ih tomu di laid nga amu yolo mamakai dot tusin tu pogiolon-olonon nopo kaka. Kinoring palanuk toi ko roun dot sigup, kupi om nunu nopo nga poolonon dot tusi, tikan masin, gula om nunu nopo ih aiso ...

Langadon oku daa koposion di laid nga nung baino, nokoundalih noh koposion ...