Sunday, September 11, 2011

Kawin don gulu gulu

Osorou ku di laid okoro oku poh, insaru oku igitan di tama ku moi pamaramai kawin. Kawin di laid nopo nga misuai kopio mantad kawin baino tu di laid nopo oinsanan nopo di tulun rumikot nga surungan dot taakanon, okon ko sompori-pori sumouk (layan diri) miagal baino. Surungan ka nopo nga 'berhidang' ka Malayu. Sumuang tulun-tulun hiri'd walai, mirikau nondo hiri'd sirang mogitoning-toning. Koubasanan nopo nga mirikau poinsondih limput. Songira oponu tulun hiri'd toning limput, haro nondo mindikau hiri tanga sirang. Pipiro tulun nokosilih do 'pelayan' mongoi nondo ponurung taakanon kumaa dit tulun-tulun songirikau ...

Koubasanan nopo kawin di laid nga haro noh ongo duo ko tolu rinapa. Iso nopo nga bihun sup manuk, koduo nopo nga daging 'kicap'. Takano nopo nga linopot dot roun doringin toi ko mangaung. Oinsanan nopo tulun nga tikidan dot iso tompurung tokoro dot posuangan mi sup ... pisouk souk iri sup mantad balanga tagayo om potikidon nondo kumaa oinsanan iri poinrikau.

Haro nogi woig toomis potikidon, koubasanan nopo nga woig 'milu' dit anaaing, om nogi 'urin'.

Kaakan nopo nondo ngawi tulun nga tikidan nondo ruti .... haro ourod, haro abasagi om haro nogi susuai. Koubasanan ku nopo manganu nga iri ruti ourod tu oomis gia.

Aiso nodi kawin miagal di dondo. Haro duo kawin di wawagu nongoi ku (hiri'd suok kampung), pinoposurung dot takano linopot linangatan dot guol miampai dot takano koubasan. Aramai tomod kopurimanan ku tu lalaid oku noh amu kaakan miagal dih maso kawin nga iri po tu rinapa-rinapa nopo dau nga kogumuan dot rinapa 'moden'. Haro pinoposurung rinapa roun mundok nga okuri tomod pinoilih, amu oku nabangat minoi pangakan.

Siumbal oku daa kagu mongoi kawin miagal di laid tu 'traditional' kopio taakanon.